H.S.A INDIN DAN

HSA Indin a ni dan: Kum 1937/1938 lai khan Manipur-a tlangmi threnkhatin hnam hming chawiin inchuklai inzawmkhawm pawl an hung indin dawk a, Imphal tienga Hmar inchuklaihai lai chun Hmar Students' Association indin nuomna lungril a hung pieng tah a nih. Mi taima le inchuklaihai leiin HSA chu indin dawk a hung na, Inkhawmpui hmasatak chu kum 1939 khan Ngurte Khuo Tuithraphai-ah nei a lo ni tah. Hi truma HSA lo trantu ei hriet thei hai chu hienghai hi an nih. Puhai,- 1. HL Daka 2. Thanglienkam 3. M. Seikeng 4. HS Sawithang 5. John Vanlalphut 6. L. Tawna 7. Thana S. Ngurte 8. HT Sandam 9. Thanglor 10. Kaithuom. Ngurte Inkhawmpui trum hin ei hnam thruoitu Puhai, Dr. Thanglung le HL Sela haiin an lo trawiawma, hmalak pei dan dingah an phur tlang hle a. HSA Khawmpui Vawi 2-na chu Phulpui, Vangaitlang-ah nei a ni nawk a, Pherzawl, Senvon a hai a kum indawt peia sunzawm a hung ni a. Indopui Pahnina sung khan HSA hin Inkhawmpui nei a hung harsa a. Pu VL Ralsun le mi dang thrahnemngaihaiin an hung kei hring trawk trawk a. 1956 chen khan Gen. Hqrs. chu Pherzawl khuo ah an nghat a nih. Thil remchang lem a ni ringin Gen.Hqrs. chu Tuithraphai ah sawn a hung ni a, vawisunni chen hin hi lai hmun a hin a la nih. HSA Office Bearer-hai bakah Hqrs. Staff siem a hung ni tran a, chuonghai chu:- Puhai, 1. HL Daka Secretary General 2. HF Nghaka Finance Secretary 3. S Rala Treasurer an nih. Hi lai hun a Secy. Gen. hi a taimak leiin Literature tieng le Cultural tieng khawm hun iemanichen a chel nghe nghe. Hieng lai hun a hin Sawrkar le indawr tranin Hmar Trawnga Pawlsawm Vernicular hnina chen Assam-ah an lo submit a nih. HSA Chanchin hi Lekhabu pui a siem khawp zet a um a nih. Hril zo el chi a ni nawh. Asia Students' Federation (ASF), NESO, KSO, CDSU, ATSUM, ETC a khawm ngirhmun insang chel phakin Palai ei nei phak hlak. -https://m.facebook.com/groups/216517661717725?view=permalink&id=894240193945465&refid=18&_ft_&__tn__=%2As